lunes, 21 de mayo de 2018

Semana das Letras Galegas na Aula de Contos

Os máis cativos celebraron a semana das Letras Galegas ao grande na Aula de Contos de Infantil con diversas actividades organizadas polas súas titoras.
As profes Ana Sánchez e Carmen Nemiña foron as encargadas de adaptar e poñerlle voz ao libro infantil de Maria Vitoria Moreno "A festa no faiado" que conta a historia dunha boneca, Uxía, que foi abandonada no faiado cando a súa dona se fixo maior.
Fixeron bandeiras coa homenaxeada, cantaron un rap dedicado a ela... e ao final todos encantados de  coñecer un pouco máis a esta xenial escritora.


martes, 15 de mayo de 2018

Letras Galegas 2018


Entramos na semana das Letras Galegas! Como sabedes a Real Academia Galega promove desde 1963 a celebración do Día das Letras Galegas, dedicada cada ano a unha figura destacada polo seu labor a favor da lingua e a literatura galega.
Este ano renderase homenaxe á escritora e profesora María Vitoria Moreno Márquez e Galicia encherase de actos sobre o seu legado.
María Vitoria Moreno é pontevedresa de adopción. Chegou a Galicia en 1963 e namorouse da nosa terra. A propia autora declaraba en 1993: “A miña relación con Galicia e a miña opción pola súa lingua é simplemente unha historia de amor”. 

*Mural realizado polo alumnado de 4º nivel

*Mural realizado polo alumnado de 6º nivel

lunes, 14 de mayo de 2018

Os libros de Celtia a "titiriteira"

Consorcio Editorial invitou a semana pasada aos nosos alumnos e alumnas de 1º e 2º de Primaria a gozar na biblioteca dunha magnífica contacontos como é Celtia Figueiras.

Celtia conseguiu levarnos de viaxe por lugares marabillosos cos seus "libros titiriteiros". Os libros eran enormes e pesados e tamén moi especiais xa que o seu interior escondía historias máxicas nas que todo é posible e que trataban temas como a procura da propia identidade, a perseveranza, o valor da amizade ou a importancia da cooperación.

Visita de Pere Tobaruela


O pasado venres o alumnado de 3º nivel tivo a sorte de gozar da visita do escritor de orixe catalá Pere Tobaruela, que xa leva moitísimos libros publicados, e que nesta ocasión veu falar da súa obra "Cinco horas con Mauro", libro escollido para ler no Proxecto lector neste curso.


O encontro foi moi participativo e Tobaruela, aproveitando as opinións e preguntas dos rapaces, incidiu no tema principal do conto, o acoso escolar, dándolles aos nenos e nenas o mellor consello: diante de calquera problema, a mellor canle para solucionalo e pedir axuda aos que nos rodean: amigos, pais, profesores... 

miércoles, 9 de mayo de 2018

Visita de Sara e Alex na Aula de Contos


Onte os peques de 5 anos tiveron unha sorpresa moi agradable con Sara e Alex, dous contacontos da Editorial Kalandraka. Alex co seu acordeón e Sara coa maleta chea de misterios fixeron voar a imaxinación dos máis cativos con contos moi divertidos que xa coñecen moi ben como a "A horta de Simón" ou "O coelliño branco".


martes, 8 de mayo de 2018

Preto do Selo CCB

 O Selo CCB  é un recoñecemento anual que ten como finalidade resaltar o valor dos proxectos máis destacados dos distintos tipos de bibliotecas a nivel nacional. É outorgado polo Consejo de Cooperación Bibliotecaria  que é un órgano dependente do Ministerio de Cultura.
Decidimos presentar o noso Proxecto Territorio das Art-Tics no mes de setembro dentro da categoría de Bibliotecas Escolares porque temos un pouco de soñadoras e un pouco de insensatas. 
Non conseguimos ser gañadores do selo pero fomos finalistas e para nós xa é un logro moi importante que nos carga de enerxía positiva.
Queremos enviar a nosa noraboa aos dous centros gañadores e ao compi finalista. No enlace podedes ver os seus proxectos. Unha honra estar ao voso lado.


Mellores lectores do mes de abril


Parabéns aos premiados: Andrés, Claudia, Sabela, Aarón, carolina e Saray. Animamos ao resto do alumnado a seguir esforzándose en ler moito para acadar o premio. Podedes conseguilo!

lunes, 7 de mayo de 2018

Correlingua 2018

O pasado venres 4 de maio os niveis de 3º e 5º de Educación Primaria participamos no Correlingua, unha andaina a prol da nosa lingua, con festa e concerto final ao pé da Torre de Hércules. 
Pasámolo moi ben e ata gañamos o 3º premio pola nosa animación!!!  
A LINGUA NON PARA!!!

viernes, 4 de mayo de 2018

Novidades Maio


Xa están aquí as novidades máis destacadas que encontraredes este mes na biblioteca.
Recomendable lectura para os lectores expertos os 3 conmovedores e emotivos libros da saga Wonder. Libros que tratan sobre o bullying e a aceptación dos diferentes.
Tamén recomendable a colección da National Geographic Kids para nenas e nenos curiosos que queiran adentrarse na vida natural e salvaxe.

miércoles, 2 de mayo de 2018

Concerto Rock Arteixo


Rematamos o pasado luns a nosa "resemana" do Libro cunha boa dose de Rock da man do noso profe de música Javi Naya. Esta vez veu acompañado dos seus amigos Moncho e Mon e entre os tres deron un repaso ao Rock e ao Blues con música de Jimi Hendrix, Deep Purple, Queen, Iron Maiden, Led Zeppelin, Gary Moore, The Who, AC/DC... así como unha pequena homenaxe ao recente Premio Nobel de Literatura 2016 Bob Dylan coa  canción "Knockin´ on Heaven´s Door"
Houbo tempo para clásicos pero tamén para aprender a diferencia entre un baixo e unha guitarra ou para oir unha jam session en directo partindo de tres notas.
Moitas grazas Javi, por regalarnos este pedazo de concerto.


sábado, 28 de abril de 2018

Apadriñamento Lector 2018

Esta era unha conta pendente da biblioteca dende fai anos. Os números daban moito medo. Casi 400 padriños e madriñas e o mesmo número de afillados e afilladas. 15 aulas de 4º, 5º e 6º de Educación Primaria e 15 aulas de Educación Infantil. Unha semana completa de apadriñamentos.
Pero este ano tiña que ser: espazos, horarios e moito conto para arriba e para abaixo.
E alá fomos...

Unha vez lanzada, a actividade empezou a crecer en mans das titoras e titores: houbo visitas e merendiñas previas ao apadriñamentos. Fotos intercambiadas e nomes aprendidos. Pequenos agasallos que levaban moita ilusión engadida e moitos ensaios previos porque todos e todas querían contar o mellor conto aos seus afillados. Sobre todo houbo lazos, deses que nos unen e que nos fan felices.
Resumir o día é practicamente imposible. Moita emoción e sensibilidade.
As nosas titoras e titores conseguiron converter unha desventaxa nunha fortaleza. Así somos... Parabéns!!!

6º de Primaria / 3 anos


5º Primaria / 4 anos


4º Primaria / 5 anos