miércoles, 6 de diciembre de 2017

A Hora do Código en imaxes

Aquí tedes as imaxes de como transcurreu A Hora do Código no noso cole cos distintos programas. A semana do código foi curta pero intensa!!


Ao rematar a xornada, todo o alumnado levou un diploma e un adhesivo que certifica a súa participación na Hora do Código. Os diplomas foron enviados aos seus enderezos electrónicos.

martes, 5 de diciembre de 2017

3º Premio GSD Innova para Ponte dos Brozos


Onte recibimos unha moi boa noticia polo terceiro premio GSD Innova ao xenial proxecto "Realidad virtual & Storytelling. La siguiente generación". É unha gran recompensa ao gran traballo realizado polas nosas compañeiras Begoña, Aurora, Sonia, Patricia, Luz e Raquel xunto ao noso coordinador TIC Fernando. Parabéns a tod@s!!!
O xurado destacou deste proxecto “o uso da tecnoloxía como medio de expresión creativa e de comunicación de forma interdisciplinar. Este enfoque permite desenvolver múltiples competencias baseadas na xeración de novas linguaxes”.

lunes, 4 de diciembre de 2017

Mapa Robótico

Coseguímolo!!! O noso centro xa está no mapa da robótica europea e temos o noso selo por participar na ERW2017 e ben bonito que é...

viernes, 1 de diciembre de 2017

Novidades decembro: Cómics


O cómic é un xénero de literatura que na nosa época estaba destinado a un público quizá máis adulto, máis maduro, pero que temos a sorte de que cada vez se está achegando máis aos pequenos lectores e espertando maior interese, sobre todo na nosa biblioteca.
Este mes poderedes gozar de novos cómics que merecen moito a pena tanto polo seu valor gráfico como polo seu contido adaptado, valores, temáticas, formatos e diversidade. Esperemos que vos gusten!

miércoles, 29 de noviembre de 2017

A Hora do Código en Ponte dos Brozos


Fai xa cinco anos que foi a primeira vez que participamos desta iniciativa a nivel mundial e que volveremos repetila este ano cos nosos alumnos e alumnas de todos os niveis os días 4 e 5 da vindeira semana. Este ano utilizaremos tres programas: SCRATCH Junior e Lightbot para os máis cativos e a partir de 4º nivel CoSpaces Edu, coas actividades "Pirate Plunder" e "Robot Rattle".


"Pirate Plunder" desenvólvese nun ambiente 3D e teredes que axudar a un capitán pirata a alcanzar o seu tesouro arrastrando e soltando bloques visuais para escribir o código. Haberá que escalar, pelexar, xirar... a través de desafíos de complexidade crecente mentres aprendemos a crear códigos eficientes con bucles e a escribir comportamentos intelixentes con condicións.


En "Robot Rattle" teremos que operar cun robot simulado coa axuda da linguaxe da programación. Aprenderemos a mover as súas articulacións por medio de ángulos e así programalo para empuxar e agarrar obxectos. 

Superaredes todos os retos propostos? Seguro que si, pois a maioría de vós xa sodes expertos codificadores. Sorte rapaces!

miércoles, 22 de noviembre de 2017

ERW2017 na biblioteca

Esta semana está sendo moi movida na biblioteca porque a Revolución Robótica esténdese polo pavillón I na celebración da Semana da Robótica. Un antigo amiguiño, que xa coñecemos de infantil, serviu para comezar a programar secuencias de ordes nun robot: a abella Bee-Bot. Houbo moito nervio e algún momento de desesperación porque a abella non ía para onde nós queriamos, pero todo formaba parte dun proceso que nos levaba primeiro a pensar coa nosa cabeciña cales eran os comandos que tiñamos que usar para que o Bee-Bot chegara ao seu destino.



Aprendemos que equivocarse é un paso máis no proceso e que enfadarnos non serve de nada. Hai que volver ao principio. Ao final, todos conseguiron as súas estrelas e un diploma que brillaba con luz propia certificando a súa participación na ERW2017.



martes, 14 de noviembre de 2017

Semana da Robótica


Do 17 ao 24 de novembro celébrase no mundo enteiro a Semana dos Robots co obxectivo de promocionar os avances tecnolóxicos no mundo dos robots e a programación.
Nós non podíamos faltar xa que temos a nosa Revolución Robótica nos corredores de 1º EP, así que xa temos creado e inscrito o noso EVENTO ROBÓTICO na ERW2017 (European Robotics Week).

Experimentaremos coa app Bee-Bot para descubrir como seguir unha secuencia de comandos que nos permitan mover o noso robot ata chegar ao noso obxectivo, usando a famosa técnica do ensaio-error: se un paso non nos funciona, volveremos tentalo ata conseguir pasar o reto e acadar estrelas como recompensa.
A botoeira dos Bee-Bots é igualiña á dos nosos Escornabots porque son curmáns!!! Seguro que será moi facil coa de práctica que xa temos.
Moita sorte, pequechos!!

miércoles, 8 de noviembre de 2017

English Fnatics Club

Xa temos nome para o noso English Club... Estamos encantados de como está a funcionar esta experiencia nova na biblioteca. O noso auxiliar Sisto está resultando unha gran fichaxe: dunha forma distendida e divertida, os nosos nenos e nenas de 6º de Primaria están a mellorar o seu inglés oral nos proxectos lectores na biblioteca. Sisto é quen de crear unha atmosfera acolledora onde ninguén ten medo de equivocarse.
Acabarán sendo uns expertos en Hedbanz, Scrabble ou Who is who? e reforzando as súas habilidades comunicativas.
Moitas grazas, Sisto!!!



lunes, 6 de noviembre de 2017

Novidades: libros de robots, robótica e programación


As novidades recentemente chegadas á biblioteca son recomendacións de ficción e non ficción pero sempre coa mirada posta no mundo dos robots, a robótica e a programación: divertidas historias de aventuras de robots, guías visuais e manuais de programación...

jueves, 2 de noviembre de 2017

Mellores lectores do mes de outubro


Comezamos un ano máis a xuntar nun cadro de honra aos mellores lectores e lectoras de cada mes, un por nivel. Hoxe viñeron buscar o seu agasallo á biblioteca os ávidos lectores Hugo, Natalia, Andrea, Marta, Claudia e Yeray. 
Parabéns a tod@s ... e xa sabedes... a seguir lendo!

lunes, 30 de octubre de 2017

Un Samaín de terror e libros!

Estamos  nunha época do ano que nos encanta: o Samaín! Ao contrario do que moitos pensan, esta festividade non é exclusiva das culturas anglosaxonas, senón esta coma outras culturas a tomaron emprestada dos celtas. Si, si... dos nosos ancestros!!


As historias de medo e terror xa invadiron a nosa biblioteca... Hai Samaín para todas as idades e para todos os medos. Botádelles un ollo!


Tamén podedes visitar as nosas guías de lectura en Pinterest onde atoparedes moitos libros terroríficos e misteriosos, de monstros, de bruxas...